Qëllimi kryesor i këtij Masteri është të përgatisë profesionistë të kualifikuar për të punuar me fëmijët dhe familjet, në praktikë direkte, në hartimin e politikave, zhvillimin e programeve dhe advokaci, si dhe për të kontribuar në kërkimet shkencore në këto fusha.

Objektivat kryesore të këtij Masteri janë:

• Të përgatisë studentët që të kuptojnë rëndësinë e të drejtave dhe ndikimin e tyre në jetën e fëmijëve dhe familjes.
• Të aftësojë studentët të zgjedhin metodat në praktikën e punës sociale me fëmijët dhe familjen, sipas një perspektive të të drejtave të njeriut, ekosistemike dhe të konstruksionizmit social.
• Të përgatisë studentët të advokojnë për përmirësimin e programeve sociale, veçanërisht lidhur me përjashtimin social dhe përfshirjen sociale të fëmijëve dhe familjeve.
• Të pajisë studentët me njohuri për të marrë pjesë dhe për t'u pozicionuar në debate, të cilat trajtojnë aspektin e mosdikriminimit dhe përfshirjes sociale të fëmijëve dhe familjeve.

Masteri Shkencor në Çështje të Fëmijës dhe Familjes është i organizuar në katër semestra dhe vlen 120 kredite. Përgjatë semestrave, studentët zhvillojnë 13 lëndë. Një hapësirë e rëndësishme i është kushtuar praktikës profesionale në institucione, për të siguruar aplikimin e njohurive akademike në praktikë, përgjatë semestrit të tretë dhe të katërt. Gjatë semestrit të katërt studentët përgatisin edhe mikrotezën.

Përfundimi me sukses i Masterit Shkencor i mundëson studentëve të interesuar, vazhdimin e studimeve në programin e Doktoraturës në Punë Sociale, pranë Departamentit.